BACOLOD CITY—Paga-imbestigaran sang Bacolod City Police Office (BCPO) ang natabo nga pagpadala sang isa ka cake nga may nakatungtong nga dulunggan sang tawo sa isa ka pulis.
Suno kay City Director Police Col. Manuel Placido, indi na bag-o pa sa ila ang makabaton sang threat ukon pamahog bangud kabahin ini sang ila trabaho bilang pulis.
“For me, I think there is nothing new in us receiving some kind of threats from someon we knew or unknown to us because it is part and parcel of our job as a policeman.”
Dugang pa sang city director, ang natabo ang posible nga personal matter sa tunga sang sender kag receiver.
Nagalaum kag nagapangamuyo naman si Col. Placido nga kun sin-o man ang patay nga tawo nga nagapanag-iya sang nasambit nga dulunggan ang makaangkon na sang katawhayan.
Samtang, ginatul-id man karon sang mga otoridad, kun matuod ang report nga ginapanag-iyahan sang lalaki nga nasapwan nga isa na ka bangkay sa siudad sang Victorias pila ka semana na ang nakalipas ang dulunggan nga gintungtong sa cake.
