Patay ang isa ka lalaki nga nagasaulog sang iya ika-28 nga kaadlawan sa nagluntad nga aksidente sa dalan Lacson, Brgy. Mandalagan, sa syudad sang Bacolod sang gab-i sang Martes, Agosto 16.
Ginkilala ang biktima nga si Jundie Doroteo, anay security guard kag residente sang Brgy. Campo Santiago sa syudad sang Sagay.
Igadul-ong kuntani sang biktima ang angkas sini nga babayi sang nakabunggo ang ginamaneho sini nga motorsiklo nga Bajaj CT-125 sa likod sang truck nga Canter sang isa ka catering service.
Base sa pahayag sang pila ka mga saksi, una nga nakapundo ang truck bangud nagpula ang streetlight sang hinali nabatian ang lagapok, kun diin nahibaluan nga nakabunggo ang motorsiklo sa likod sang truck.
Suno sa angkas sang biktima, ginpapundo pa sini si Doroteo bangud red light apang nagdiretso ini sa gihapon.
Nahibaluan nga ginsaulog sang biktima ang iya kaadlawan sa syudad sang Talisay kun diin may inom-inom, rason kun ngaa yara ini sa impluwensya sang makahulubog nga ilimnon samtang nagamaneho. Wala naman nahalitan ang angkas sini nga babayi.
Nabuka ang nawala nga tuhod kag nabuslot ang ulo sang biktima nga posible gintunaan sang iya kamatayon apang wala naman nahalitan ang iya angkas.
