Bus conductor nga naghimo sang duyan sa sulod sang Ceres bus agud mapahipos ang nagahibi nga bata, ginpasidunggan

BACOLOD CITY – Ginpasidunggan ang bus conductor nga naghimo sang duyan sa sulod sang Ceres bus agud nga mapahipos ang nagahibi nga bata sang isa ka pasahero.

Ginhatagan sang pagkilala sang Vallacar Transit Incorporated-Bacolod South Branch si Roldan S. Atendan “for his outstanding service and passion in performing his duty at his best,” suno sa post sang bus company.

Nangin viral si Atendan sang ini ang nakuhaan sang litrato nga nangita sang paagi agud mapahipos ang bata.

Suno sa Facebook post ni JizaMarie Gallego Magbanua, tuman ang hibi sang bata kag magutok ang Ceres nga ila nasakyan. May routa nga Canlaon ang Ceres.

Sang nag-ligwa na, naghimo sang duyan si Atendan agud nga mapahipos ang baby.*