Magapartisipar ang Cadiznon nga si Jan Michael Areglado Lozada sa pagahiwaton nga ika-10 nga Southeast Asia Karate Federation (SEAKF) Championships sini nga Marso 13 tubtub 19.
Kwalipikado si Jan Michael sa nasambit nga torneo matapos magdaug sang silver medal sa ginpatigayon nga Karate Pilipinas National Championships sa Philsports Arena sang tinalikdan nga Pebrero 20.
Si Jan Michael ang naga-edad sang 15-anyos pa lamang, estudyante sa Grade 9, kag residente sang Hacienda Reboton, Brgy. Tinampa-an, siudad sang Cadiz.
Ginapabugal si Jan Michael sang iya mga ginikanan nga sanday PMSg. Michael Lozada kag Almira Lozada; lunsay mga tumandok man sang nasambit nga siudad.
Ginapalambut man sang mga ginikanan ang ila pagpasalamat kay Cadiz City Mayor Bading Escalante sa pagsuporta kay Jan Michael.