Ginpasaka na ang kaso nga Grave Threat, Acts of Lasciviousness kag paglapas sa Republic Act 9995 ukon Anti-Photo and Video Voyeurism Act of 2009 batok kay Dennis James Traza nga isa ka technical support call center agent nga nagblackmail sa 19-anyos nga dalaga nga ipalapta ang nude photos kag videos sini kabaylo sang pagpakighilawas.
Sa interview sang Radyo Bandera Bacolod, ginkumpirmar ni Police Major Joery Puerto, hepe sang Police Station 8 nga ila ginpasaka pinaagi sa inquest proceeding ang nasambit nga mga kaso.
Madumduman nga si Traza ang nadakpan pinaagi sa entrapment operation sang mga otoridad matapos nga nagdangop ang biktima nga iya ginablackmail.
Nahibaluan nga base sa imbestigasyon, nagkilalahay ang mga ini sa isa ka dating app sa diin nagpakilala pa ang suspek nga isa ka foreigner.
Nakasugtan sang mga ini nga magapadala si Traza sang dyes mil pesos nga kantidad kabaylo sang hublas nga mga litrato sang babayi.
Apang suno sa biktima wala siya nakabaton sang nasambit nga kwarta matapos sini masend ang iya mga litrato kag videos kag ginpahog pa ini sang suspek.
Sa karon si Traza ang nagapabilin sa kustodiya sang Bacolod Police Station 8.*
