Nagdangat sa P1,468,800 ang kabug-usan nga balor sang iligal nga druga nga nakumpiskar sang City Drug Enforcement Unit sa ila tatlo ka separado nga buybust operations sa ciudad sang Bacolod.
Ginabulubanta P714,000 ang nakuha nga ginasuspetsuhan shabu sa ginpatigayon nga buy-bust sa Purok Roadside, Barangay Tangub, takna las 2 sang aga, subong nga adlaw sang Biyernes, Pebrero 26, 2021.
Dakup sanday Glaiza Alvaran, alyas “Masang,” 34-anyos, Leobert Polvora, alyas “Amay,” 40-anyos, kag Jonave Umadhay, alyas “Didi,” 44-anyos.
Samtang P680,000 nga balor sang iligal nga druga naman ang narekober kay Gino Inventor, alyas “Peter Pan,” nga natiruhan pa sang mga operatiba sang ini ang nagpalagas halin sa Barangay Alijis tubtob Taculing, takna las 6:15 sang gab-i, Huwebes nga adlaw, Pebrero 25.
Nakuha man kay Inventor ang isa ka .38 caliber revolver, isa ka fired cartridge, tatlo ka live ammunition, kag ang Yamaha Aerox nga motorsiklo nga ginsakyan ni Inventor.
Malapit P74,800 naman ang nakuha sa buy-bust sa Purok Kagaykay, Barangay 2 sa ciudad sang Bacolod, takna 4 sang hapon, Pebrero 25, 2021.
Nagresulta man ang Barangay 2 buy-bust sa pagka-aresto nanday Romeo Imperial Jr., alyas “Junior,” isa ka Street Level Individual, 21 anyos, kag si Christian John Andiano, alyas “Jan-jan,” 20 anyos.*
