E.B. MAGALONA – Pagkatapos makabaton P100,000 nga cash award halin sa gobyerno sang Negros Occidental sang tinalikdan nga Nobyembre, nakabaton liwat si Nanay Herminigilda Barredo-Donasco sang P100,000 halin sa Department of Social Welfare and Development (DSWD) sang Pebrero 22.
Nabaton ni Nanay Herminigilda sang Brgy. Damgo, banwa sang E.B. Magalona ang Centenarian Cash Gift nga P100,000 sa idalum sang Republic Act No. 10868 ukon ang “Centenarians Act of 2016.”
Nakabaton man si Nanay Herminigilda sang felicitation letter halin kay Presidente Ferdinand Marcos Jr.
Ginsaulog ang ika-100 nga kaadlawan ni Nanay Herminigilda sang tinalikdan nga Abril 18, 2022.
May lima ka kabataan si Nanay nga senior citizens na kag naga-edad sang 61 tubtub 71-anyos.
“Isang mainit na pagbati sa inyong ika-sandaang kaarawan. Nawa, ang iyong buhay at mga pamanang aral ay habambuhay na tumatak sa isipan, at tularan ng inyong mga mahal sa buhay at ng mga taong hinaplos ng iyong buhay,” mensahe sang presidente.