Patay ang construction worker matapos ini ang mabungguan sang Toyota Wigo nga salakyan samtang nagatabok sa intersection sang Mabini National Highway, Purok Bangga 12 sa Barangay Zone 1, Talisay City sa Negros Occidental, takna las 10:20 sang aga, Huwebes, Hulyo 7, 2022.
Naka-agum sang nagkalain-lain nga samad sa iya lawas ang biktima nga ginkilala kay Roberto Parreño, 55-anyos, kag residente sang Barangay Zone 1 sa Talisay, sandig sa spot report sang Negros Occidental Police Provincial Office.
Gindala sa Corazon Locsin Montelibano Memorial Regional Hospital sa syudad sang Bacolod si Parreño apang ini ang gindeklarar nga patay sang attending physician takna las 4:20 sang hapon, Huwebes.
Suno sa saksi nga si Jesus Panes, 55-anyos, chief barangay tanod, nagatabok sa dalan si Parreño sang ini ang nabungguan sang Toyota Wigo nga nagapadulong sa norte nga bahin sang highway.
Ginamaneho ang Toyota Wigo ni Claire Anne Javelona, 20-anyos, residente sang Barangay Guinhalaran, syudad sang Silay, Negros Occidental.*
