BACOLOD CITY – Ginpa-blotter ni Punong Barangay Ricky Mijares sang Banago si Councilor Vladimir Gonzalez nga gina representar ang Home Investment Realty Incorporated (HIRVI) sadtong tinalikdan nga bulan sa Police Station 3 bangud sang alegasyon nga pag reclaim sang Purok Bayanihan sa Barangay Banago nga nagguba sa Boulevard nga proyekto.
Nangin joint project sadto sang barangay kag syudad sang Bacolod ang Boulevard.
Sa blotter report nakabutang ang reklamo ni Kapitan Mijares parte sa mga heavy duty trucks nga kargado sang filling materials nga naga pakadto-pakari sa Barangay Road sang Barrio Banago nga nag resulta sang pagka guba sang portion ka dalan.
Sa interview sang Radyo Bandera kay Kap Mijares, iya ginpahayag nga ulihi na lamang niya nahibal-an nga gina reclaim ang boulevard sa pagpati nga ang filling materials ang gina tambak sa propidad sang konsehal.
Ginpablotter niya ang konsehal sa rason nga kun sukton siya sa ulihi sang mga pumoloyo o pangitaan siya sang dokumento parte sa pagka guba sang Boulevard sa Bayanihan, may ara siya sang ipakita nga blotter report.
Sini nga adlaw, igapadala sang Barangay Banago sa opisina ni Councilor Gonzalez ang ila ginpasar nga resulosyon nga nagapa-untat sang reclamation activities sa Purok Bayanihan nga ginahimo sang Home Invest Ventures Incorporated nga ginapanag-iyahan sang konsehal.
Ginpahayag naman ni Councilor Gonzalez sa interview sang Radyo Bandera nga kompleto siya sang papeles, kag indi lang man siya ang naghimo sini sa Barangay Banago.
Suno kay Gonzalez, may pila man ka persona nga nag-reclaim sa Barangay Banago nga wala gani sang kumpleto nga dokumento kag RONO ukon resolution of no objection.
Ginpahayag pa sang konsehal nga ini nga mga persona nga wala sang kumpleto nga dokumento ang nagpahalin pa sang 50 ka mga pamilya sa isa ka purok sa Banago.
Dugang pa ni Councilor Gonzalez nga handa niya nga atubangon ang tanan nga pamangkutanon ni Kapitan Mijares kag maga padayon ang HIVRI sa proyekto nga gina tukod sa Banago.*
