Wala sang dapat nga kabalak-an ang mga lalaki nga maglip-ot ang ila kinatawo sa 1 inch tubtub 1 ½ inch, matapos nga makaangkon sang COVID 19.
Suno kay Dr. Nantawat Siritanan gikan sa Nopparat Rajathanee Hospital sa pungsod Thailand, kinahanglan nga magpakigkita sa urologists okon sa erectile dysfunction experts ang mga lalaki, nga nagakabalaka angut sa pag-gamay sang ila kinatawo , matapos nga nakaangkon sang COVID 19.
Una diri, naglapta ang facebook post sang medical technician nga si Pakphum Dejhassadin okon “Mor Lab Panda”, sa diin ginpalayag sini, nga isa ka American national nga lalaki ang nakatukib nga naglip-ot ang iya kinatawo, matapos nga nakaangkon sang COVID.
Ginsaysay man ni Pakphum sa post, nga may mga reports nga mahimo mag resulta sa blood clotting sa kinatawo sang lalaki ang COVID kag may paghina man ang sirkulasyon sang dugo sa sex organ sang mga kalalakin-an , rason kon nga a , indi magdaku ang kinatawo.
Ginpaathag naman ni Dr. Nantawat, nga posible magresulta sa “inflammation” sang sex organ sang mga lalaki ang pag positibo sini sa COVID 19 nga nagaresulta naman sa “blood clotting”.
Apang, ginkumpirmar sang doktor nga may yara lamang sang tuman ka gamay nga kadamuon sang kaso sini sa Thailand kag abroad.
Wala man sang pamatuod nga nagagamay ang kinatawo sang lalaki nga nakaangkon sang COVID.
Posible nga nag suspetso lamang ang mga pasyente nga nagpositibo sa COVID, nga naapektuhan ang ila sex organ, suno sa doktor.
Gintumod ni Dr. Nantawat ang edad, obesity (pagtambok) kag balatian, bilang rason sa paggamay sang kinatawo sang lalaki.*
by: Sunshine Lacson
