Nagpaathag ang Department of Foreign Affairs-Bacolod natuhoy sa kontrobersiya sang ila nga website sa diin masami nga wala sang ‘available’ nga petsa ukon slot para sa passport renewal appointment.
Sa interview sang Radyo Bandera kay Mr. Rex Albania, pinuno sang DFA-Bacolod, ginpaathag sini nga yara sa Manila ukon sa ila nga central office ang nagakontrol sang mga appointments sa ila nga website.
Ginbulgar man sini nga bangud sa mga ‘fixers’ nga amo ang nagabantay kag nagakuha sang mga slots ang isa sa mga rason nga wala sa gilayon ginabuksan ang releasing sang nasambit nga mga appointments.
Ginsiling sini nga ginabaligya sa mas mahal nga presyo ang mga appointments nga makuha sang ginapahayag nga mga fixers.
“Actually ang online appointment indi kami ang naga-control. Sa Manila, may ano na da sa Manila nga sila ang ga-control sang appointment tapos ang releasing sang appointment waay nila ginabuksan dayon… kay ngaa, may ara sang mga ‘setter’ or ‘fixer’ ang ginahimo nila ginabantayan kag ginakuha ang mga appointments kag ginabaligya nila on a higher price,” pahayag ni Albania.
Dugang pa sini, indi lamang Bacolod ang naka-eksperyensya sang mga kaangay nga problema kundi pati man ang iban nga lugar.
Samtang, ginsiling naman sini nga may yara sila sang ginatawag nga ‘Courtesy Lane’ sa diin mahimo maka-request sang appointment ang mga senior citizens, PWD, kabataan nga naga-edad 7 ka tuig panubo kag mga returning OFWs, pinaagi sa pagmessage sa email address nga ila ginhatag.
Apang suno kay Albania, limitado lamang sa 30 ka slots ang mahimo maakumodar sa nasambit nga lane sa isa ka adlaw.
Ginpahayag man sang DFA-head nga maamat-amat na balik ang kadamuon sang mga appointments nga ila i-cater per day bangud ginpaidalom na sa alert level 1 ang siudad sang Bacolod.
Sa second quarter sang ini nga tuig natalana naman nga pagabuksan sang ahensya ang Temporary Offsite Passport Site ukon TOPS nga maka-akumodar sang 300 tubtob 500 ka appointments kada day nga para lamang sa ‘renewal’ sang passports.
Nagpangayo naman sang pasaylo si Albania sa pila ka mga problema sa ila nga website kag nagahingyo ini sang malawig pa nga pasensya sa publiko bangud suno sa iya indi pa perpekto ang appointment system sang ahensya apang ginpasiguro sini nga nagahimo sila sang tikang nga mapasanyog kag mapamaayo pa ang ila serbisyo.*
by Jinn Siatita
