Wala nalakip ang ginatawag nga “dolomite beach” sa mga proyekto nga pagapondohan sa Manila Bay’s rehabilitation program sa 2022, suno sa isa ka opisyal sang Department of Environment and Natural Resources (DENR).
Suno kay DENR Undersecretary Jonas Leones nakatalana ang ginaproponer nga P1.6 billion para sa rehabilitasyon sang nagkalain-lain nga river systems nga konektado sa Manila Bay.
“The P1.6 billion will comprise not for the dolomite, because budget for dolomite was already given to us during 2020 and 2019,” suno sa opisyal.
Ginsiling ni Leones nga ang pondo para sa rehabilitasyon ang pagagamiton para sa pagtinlo sang mga creek kag estero.
Apisar nga madamo sang nalipay sa dolomite artificial beach, madamo man sang nagabatikos sa nasambit nga proyekto nga nagalab-ot sa P389 million ang pondo nga ginhimo sa panahon sang COVID-19 pandemic.
Nagpaandam man ang pila ka environmentalist sa halit nga gintuga sang mga ginpodpod nga dolomite para mangin “white sand” ang nasambit nga bahin sang Manila bay.
Suno kay Greenpeace Southeast Asia campaigner Sonny Batungbacal, indi masolusyonan sang ginpodpod nga bato ang problema sang polusyon sa Manila bay.
Na una na nga ginsiling sang DENR nga gin-aprubahan sang Kongreso sadtong 2019 ang proyekto kag nag-agi ini sa bidding.
Ginpanginwala man sang ahensya nga wala sang malain nga epekto sa ecosystems sang Manila Bay ang dolomite kag indi man pamahog sa ikaayong lawas sang tawo ang ginpodpod nga mga bato.
