BACOLOD CITY – Isa ka babayi ang naglumpat na lamang halin sa ginasakyan sini nga tricycle sa dalan E. Solas, Greenplain 2 Subdivision, Barangay Singcang Airport, sa syudad sang Bacolod sang Lunes sang gab-i, Agosto 29 matapos sini ginhaumhaum nga pagadal-on ini sang drayber sa lain nga lugar.
Ginklaro naman sang drayber sang tricycle nga naglain ang ruta sini bangud naglikaw lamang ini sa ginapatigayon nga checkpoint sang kapulisan sa may Good Year.
Base sa pahayag sang 26-anyos nga pasahero, didito ini nagduda bangud nagbalik pa ang drayber bisan lapit na ini sa highway.
Suno sa drayber, naglisensya ini sa pasahero nga maliko agud malikawan ang checkpoint bangud nadakpan na ini sadto kay “colorum” ini, apang posible nga wala ini nabatian sang babayi.
Bangud sa kadulumon sang dalan, suno sa babayi, dugangan pa nga naholdap na ini sadto, nahadlok ini, rason kun ngaa ikapila ini naghambal nga manaug na ini, apang wala man nakabati ang drayber.
Dugang pa sang babayi, ginpaguwa kag gintukod na sini ang iya tiil samtang nagadalagan ang tricycle, rason kun ngaa nahukas ang sandal sini kag nakaagum sang mga pilas sa iya nga tiil.
Ginpahayag pa sang babayi nga gindulugan ini sang drayber kag naghambal pa ini nga, “naglumpat ka man ‘day man?”.
Ginpamangkot naman sang babayi ang drayber kun ngaa didto ini nagliko kag suno sa babayi, nagsabat lamang ini nga, “te kay tak-an ko da mag-agi” kag wala ini nagprangka nga tuyo lamang sini nga likawan ang checkpoint.
Ginklaro man sang drayber nga bangud nagakurog kag indi na kahambal ang babayi, ginbayaan niya na lamang kag wala niya na ini ginpilit nga idul-ong kay basi magsinggitan pa ini kag masal-an siya nga “kidnapper” ukon “rapist”.
Nag-atubangay kag nagpirmahanay na sang amicable settlement ang drayber kag ang babayi sa barangay hall sa Tangub sini nga Miyerkules, Agosto 31.
Ginpasalamatan naman ni PMAJ Joery Puerto, hepe sang Bacolod City Police Station 8, ang Radyo Bandera Sweet FM Bacolod sa pagbulig agud maklarohan ang nagluntad nga insidente.
