BACOLOD CITY – Patay ang isa ka lalaki nga nagamaneho sang motorsiklo matapos ini nakabunggo sa tricycle sa dalan Lacson atubang sang Hanz Motor, Barangay Mandalagan, cuidad sang Bacolod, takna las 3:45 kaina sang kaagahon, Domingo, Setyembre 4, 2022.
Ginkilala ang biktima kay Lemwel Lumawag, 25-anyos, residente sang Purok Sambag, Brgy. Mandalagan.
Gindala sa Corazon Locsin Montelibano Memorial Regional Hospital si Lumawag apang ini ang napatay takna las 4:19 kaina sang aga.
Sandig sa imbestigasyon ni P/SSG Richard Dema-ala traffic investigator sang Police Station 3, nagamaneho si Lumawag sang iya Honda Click 125 nga motorsiklo padulong norte nga bahin sang Lacson Street.
Gin-alegar may kadasigon ang pagpadalagan sang motorsiklo ni Lumawag sang ini ang nakabunggo sa Honda TMX 125cc nga tricycle ni Mark Anthony Desucatan, 32-anyos, kag residente sang Barangay 18, Bacolod, nga nagapadulong man sa norte nga bahin sang dalan.
Si Lumawag naka-agum sang patal nga samad sa iya nga ulo.
Yara karon sa kustodiya sang Station 3 so Desucatan apang indi man mag pasaka kaso ang amay ni Lumawag, suno kay Dema-ala.*
