Hilway na karon sa paghinakop sang kapulisan ang driver sang traysikol kag carry van nga imbolbado sa nagluntad nga aksidente sa Circumferential Road South, Brgy. Alijis, Bacolod City tinalikdan nga Agosto 8 nga ginkapatay sang motorcycle rider nga gwardiya sang UNO-R.
Sa interview sang Radyo Bandera Bacolod kay Police Captian Elmer Bonilla, hepe sang Bacolod Police Station 7, nakapiyansa sang 30 mil pesos si John Dayday nga drayber sang traysikol samtang nagrequest naman sang preliminary investigation si Warren Blance nga drayber sang Suzuki carry van.
Suno kay Bonilla, ginhatagan sang piskal sang napulo ka adlaw si Blance nga magsabat sa akusasyon nga ginpasaka batok sa iya.
Pananglitan makumbinsir sini ang piskal nga wala siya sang sala sa natabo, mahilway ini apang kun may makit-an nga probable cause, magagwa ang iya warrant of arrest.
Samtang si Dayday naman ang obligado naman nga mag-tambong sa patigayunon nga hearing sa iya nga kaso bangud kun indi ini makapakita, paga-isyuhan man ini sang warrant of arrest.*
