Ginpahayag ni Philippine Drug Enforcement Agency-Negros Occidental head Nicolas Gomez nga nagagikan sa Manila ang shipment sang iligal nga droga nga nagasulod sa Bacolod City kag Negros Occidental.
Sang nag-igo ang pandemya, suno kay Gomez, may mga personalidad sila nga ginatawag nga “human kabayo” ukon mga courier nga amo ang nagapadulong sa Metro Manila kag amo man ang nagadala sang droga diri sa ciudad kag probinsya.
Nakahimo man ang mga ini sang panibag-o nga trend sa pag-transport sang mga kontrabando kaangay na lamang sa paggamit sang lehitimo nga courier services ukon pagtago sang mga items sa mga legitimate items agud nga indi madakpan.
Gin-ako man ni Gomez, nga isa sa ila mga problema sa mga kaangay sini nga kaso, amo nga antes nila mabal-an nga may shipment sang droga nga pasulod sa probinsya, nakatigayon na ini nga makalusot.
Ginbulgar man sini, nga may mga impormasyon pa sila nga nabaton nga mas madamo pa ang luyag nga magpalusot sang droga sa probinsya.
Bangud sini, luyag sang PDEA nga pabaskugon ang ila nga intelligence gathering kag coordination sa mga kaprobinsyahanan ilabi na sa mga natumod nga lugar nga ginaagyan sang mga cargo vessels.
Maga-coordinate man sila sa K-9 family ilabi na sa Panay agud kun may yara gid man sang maglusot, mapunggan sa gilayon.*
