Ginreport sang City Epidemiology and Disease Surveillance Unit (CESU) nga nagpositibo sa COVID-19 ang duha ka mga residente nga nagpadulong sa community pantry nga gin-organisar sang aktres nga si Angel Locsin sa Quezon City sadtong Abril 28.
Ang mga babayi nga pasyente ang may edad 42-anyos kag 43-anyos nga lunsay nagapuyo sa Barangay Holy Spirit kun sa diin ginpatigayon ang community pantry.
Suno kay CESU Chief Dr. Rolando Cruz, positibo man sa makalalaton nga balatian ang 11-anyos nga bata nga babayi sang isa sa mga pasyente.
Ang menor de edad ang wala nakaupod sang nagpadulong sa community pantry ang iya iloy apang nakabatyag ini sang sintomas sang COVID-19.
Suno kay Cruz, pagadal-on ang mga residente sa isa sa mga isolation facility sa siudad agud nga matutukan.
“We will conduct immediate contact tracing to other members of their families to check if they are also infected with the virus,” pahayag sini.
Sa karon ginahulat pa ang resulta sang swab test nga ginpatigayon sang CESU sa 62 pa ka mga indibidwal nga nagpadulong sa nasambit nga community pantry.
