SARANGANI – Gin-turnover sang lokal nga mga opisyal ang duha ka adult Philippine tarsiers sa Community Environment and Natural Resources Office (CENRO) sa banwa sang Glan sa probinsya sang Sarangani sang Huwebes, Setyembre 1.
Nakabaton sang impormasyon ang CENRO halin sa isa ka municipal councilor angut sa duha ka mga tarsier nga natukiban sa isa ka farm sa Sitio Kamboling, Barangay Calabanit, sa nasambit nga banwa.
Gilayon naman nga nagkadto ang mga otoridad sa lugar agud tsekyarun ang kahimtangan sang mga tarsier.
Suno sa municipal veterinarian, aktibo, wala sang mga pilas, kag maayo ang panglawas sang mga tarsier nga ginbuy-an sa isa ka mahilway nga lugar.
Ginapatigayon sang CENRO ang Information Education and Communication (IEC) campaign sa komunidad agud mahibaluan sang mga residente ang importansya sang wildlife species.
Ginakabig nga near threatened species sang International Union of Conservation of Nature (IUCN) ang mga Philippine Tarsier bangud sa naganubo sini nga populasyon.
Ginaprotektahan ang mga Philippine Tarsier sa idalum sang RA 9147 ukon Wildlife Resources Conservation and Protection Act kun diin ginadumilian ang pagdakop kag pagpatay sa nasambit nga sapat.
