(Paandam: hikog, hungod nga wala ginhingadlan ang biktima bangud sensitibo ini nga balita)
Patay na kag nagabitay sa balayan sang masapwan ang 22-anyos nga estudyante sa ginatineran sini nga boarding house.
Base sa imbestigasyon sang Hamtic Municipal Police Station, nasapwan ang biktima nga nagabitay gamit ang nylon rope sa boarding house sa nasambit nga banwa sa probinsya sang Antique takna las-7:50 sang gab-i sang Miyerkules, Mayo 31, 2023.
Nagbilin pa ang biktima sang sulat para sa iya mga ginikanan kag abyan kun diin ginpabutyag sini nga may yara ini sang “depression.”
Gindala pa ang biktima sa ospital kun diin gindeklarar ini nga dead on arrival.
Nagapati naman ang kapulisan nga wala sang foul play apang ipaidalum sa gihapon sa post-mortem examination ang bangkay bangud natukiban nga may iban ini nga mga pilas.
Sa mga naga-eksperyensya sang depresyon ukon iban pa nga mental health issues, mahimo nga makipag-angut sa Suicide Prevention Hotline Center for Health Development-Western Visayas sa mga numero nga 09255469919, 09985324047, kag 1-800-10-333-8336 ukon sa “Hopeline” sang Department of Health (DOH) sa mga numero nga 09175584673 kag (02) 804-4673.
