Ginpakigbahin sang isa ka iloy sa China ang video kun diin makita nga makapila ka bes nga nag-alsa sang kamot ang iya bata agud magpahibalo kuntani nga nagalain ang iya pamatyag, apang wala ini ginasapak sang manunudlo.
Sang ulihi, nahulog ang 8-anyos nga estudyante sa hagdan sang buluthuan nga nagresulta sa iya kamatayon.
Suno sa iloy, makita sa video nga makapito ka bes nga nag-alsa sang kamot ang bata sa sulod sang 10 ka minutos.
Apang suno sa classmates sang bata, ginhambalan ini sang manunudlo nga agwantahon ang ginabatyag tubtub matapos ang klase.
Makita man sa iban nga surveillance videos sang buluthuan nga nagakuriit ang bata samtang nagalakat pagkatapos sang klase kag gin-alalayan ini sang manunudlo samtang nagapanaug sa hagdan.
Base sa alegsyon sang iloy, ginpuwersa sang manunudlo nga manaug ang bata sa hagdan kag ginpalayo niya ini sa railing nga ginakaptan sang bata agud indi matumba.
Nagresulta ini sa pagkahulog sang bata kun diin naigo ang likod sang iya ulo, suno sa classmate nga nakakita.
Nagresulta ang insidente sa pagka-comatose sang bata sa ospital sa sulod sang 280 ka adlaw kag ginbulong pa ini sa ila balay sang 190 ka adlaw antes ini nagtaliwan.
Sang Nobyembre tuig 2020 pa natabo ang insidente apang subong lamang napaguwa ang videos nga ginagamit sa nagapadayon nga imbestigasyon.
Nagapanawagan ang ginikanan sang bata sang hustisya kag nga mangin responsable ang mga manunudlo bangud napaslawan ang mga ini nga magtawag sang gilayon nga atensyon-medikal.
