Yara na sa kustodiya sang kapulisan ang retired army nga si Manuel Abrenica matapos nagpangluthang sa mga otoridad sang ginsita siya bangud sa traffic violation sa syudad sang Canlaon, Negros Oriental kahapon Marso 29.
Pilason sa pagpangluthang ni Abrenica ang isa ka pulis nga ginkilala kay Police Executive Master Sergeant Carlo Garcia.
Suno sa kapulisan, ginsita sang traffic enforcer ang nagpakilala nga anay katapo sang militar bangud wala ini sang helmet.
Nagresulta ini sa pagbinaisay kag pagsininggitanay amo nga nagpalapit ang mga pulis kag pila ka mga traffic enforcer.
Nangakig ang ex-army kag nagpadalagan sang iya nga motor padulong sa iya puluy-an.
Pagsulod sang ex-army sa iya nga puluy-an, kumuha ini sang .45 calibre nga armas kag ginluthang ang mga pulis nga nagsunod sa iya balay.
Nagpadulong man sa shooting incident si Canlaon Mayor Jose Chubasco Cardenas agud magnegosyar kay Abrenica matapos nga nagpamalibad ini nga magsungka sa kapulisan.
Naglawig sang kapin isa ka oras ang pagnegosyar kay Abrenica antes ini magsungka sa otoridad.
