DALY CITY, CALIFORNIA– Apat ka mga igo sang bala ang naangkon sang isa ka Filipina American sa Daly City, California,matapos nga ginluthang sang iya partner, kasunod sang mainit nga diskusyon.
Saksi sa kremin ang duha ka mga kabataan sang biktima kag suspek.
Nagluntad ang insidente, samtang nagapauli na sa ila puluy-an ang pamilya, matapos nga nag-upod sa isa ka family dinner.
Base sa alegasyon, napikon ang lalaki nga amay sang kabataan, gani ginkuha sini ang iya 9mm kag ginluthang ang iloy sang iya kabataan.
Wala matumod kon anu ang ginlalisan sang suspek kag biktima.
Detenado na sa San Mateo County Jail ang suspek.
Sa Marso 16, atubangon na sang suspetsado ang kaso nga murder kag child endangerment sa korte.
Ginpaidalum naman sa social evaluation ang duha ka mga kabataan.
Ginkilala ang suspek nga si Romier Narag, 27-anyos samtang ang biktima naman amo si Frances Kendra Lucero, 27-anyos.
Padayon pa nga ginahibalo sang kapulisan kon anu ang ginba-isan sang biktima kag suspetsado, antis nagluntad ang makasilidni nga kremin.*
