Gaka-agnas nga Bangkay sang 65-anyos nga Lalaki, Nasapwan sa Banwa sang Isabela

Nakit-an nga nagakaagnas na ang bangkay sang 65-anyos nga lalaki sa iya hiligdaan sa ila puluy-an sa Barangay Tinongan, banwa sang Isabela, Negros Occidental sadtong Lunes, Hunyo 20, 2022.

Ginkilala ang biktima kay Rene Boy Pandoro, isa ka mamumugon kag residente sang Zone 4, Isabela.

Suno sa imbestigasyon sang Isabela Police Station, takna las 5:45 sang hapon ginreport sang tanod sa kapulisan nga may nakit-an nga bangkay sang lalaki sa ila barangay.

Ginpahayag sang himata sang biktima nga may yara ini sang balatian nga pneumonia kag nagapaidalum sa treatment.

Nagdesisyon ang pamilya nga ilubong na lang ang bangkay sang biktima bangud sang maisog nga baho nga sarang pa makahalit sa ikaayong lawas sang ila mga kaingod balay.*