Ginhold sang mga kapulisan sa Kenya ang isa ka lalaki nga ila ginakilala nga “bloodthirsty vampire” matapos gin-akusaran ini may angot sa pagpatay sang indi magnubo 10 ka mga kabataan.
Gin-aresto ang 20-anyos nga si Masten Milimo Wanjala sa kaso nga pagpatay sa duha ka mga kabataan, kon sa diin ang mga bangkay sini ang ginhaboy sa kalasangan sang Nairobi.
Apang gin-ako ni Wanjala nga iya ginpatay ang 10 ka mga kabataan. Nagaisahanon niya nga ginhimo ang krimen sa mga kabataan, ilabi na yadtong naga-edad 12 tubtob 13 anyos.
Ang pagkadakup ni Wanjala ang ginkabig dako nga accomplishment sang kapulisan sa Kenya bangud sang asud-asud nga pagkadula sang mga kabataan sa lugar, tinalikdan nga semana.
Makasilidhi nga gina-massacre ni Wanjala ang iya mga biktima, kon sa diin pila sa ila ang ginpangsuyupan niya pa sang dugo halin sa ila mga ugat kag ginakuga, antes pamatyon ang mga ini, suno sa Twitter post sang Directorate of Criminal Investigation.
May isa ka tion nga nag-demand pa si Wanjala sang 30,000 Kenyan shillings (P13,937.93) halin sa mga ginikanan sang isa niya ka biktima.
Wala naman naghinulsol si Wanjala kag iya pa ginhambalan ang mga detectives nga ini ang nakakuha sang madamo nga kalipayan sa pagpatay sa mga biktima.*
