Gin-alegar “courier kag tour duty” sang Mount Cansermon Command sang NPA nga top 1 most wanted man sang Himamaylan, gindakup sa Kabankalan

BACOLOD CITY – Gin-aresto sang utoridad ang gin-alegar “courier kag tour duty sang SDG Platoon, Mount Cansermon Command sang New People’s Army sa Sitio Saisi, Barangay Tan-awan sa syudad sang Kabankalan, Negros Occidental.

Gindakup si Remark Kisan, 27-anyos, residente sang Barangay Carabalan sa syudad sang Himamaylan, Negros Occidental.

Ginakabig Top 1 most wanted sang Himamaylan Police Station si Kisan samtang Top 3 naman sa Provincial Level.

Si Kisan ang may pending nga arrest warrant sa kaso nga murder. Wala ini sang bail para sa iya temporaryo nga kahilwayan.

Gin-isyu sadtong Marso 22, 2022 ni Judge Walter Zorilla sang Regional Trial Court, Branch 55 sa Himamaylan City ang warrant of arrest ni Kisan.

Isa ka joint operation ang pagkadakup kay Kisan sang katapo sang Kabankalan Police Station, Regional Intelligence Unit-6, Negros Occidental Police Provincial Mobile Force Company, Provincial Intelligence Unit sang NOCPPO, 604^th Coy RMFB6 kag 94^th IB sang Philippine Army.

Nakahunong karon sa custodial facility sang Kabankalan Police Station si Kisan.*