Nadakpan ang gina-alegar kawatan nga nagkuha sang bag sa isa ka manugbantay sang kiosko sa New Government Center (NGC) takna las 5:45 sini nga aga sang Biyernes, Oktubre 7, 2022.
Ang suspek nga ginkilala kay Doydoy Gonzaga, 30-anyos nga residente sang Purok Malipayon, Barangay 39 ang gindala na sa Police Station 4 agud ma imbestigaran.
Nag-upod man si Mylene Dela Cruz (ang ginkawatan) kag ang iya nga kaupdanan sa Police Station 4.
Suno sa tagreklamo nga si Mylene, tagabantay sang inasalan kag tumandok sang Sagay nga nagakatulog na sila sang iya upod sang iya nabatyagan nga ginbutong sang suspek ang iya nga bag nga nagaduag sang pula nga may unod nga cash kag cellphone.
Ginlagas niya ang suspek rason nga ginhaboy man sang suspek ang iya nga bag apang iya nauyatan ang jacket sang suspek kag nadakpan ini sang naga roving nga mga pulis.
Dugang pa ni Mylene, nga sang nagligad nga gab-i nakawatan man sila sang kwarta kag duha ka cellphone.
Samtang nagpabutyag naman sa Radyo Bandera Bacolod ang mga crew sang kaiping nga kiosko nanday Mylene nga nakuhaan man sila sang duha ka cellphone kagab-i.
Target sang mga kawatan ang mga kiosko ilabi na kung kaagahon bangud tion ini sang mga manugbantay nga nagakatulog kag diri nagapang-atake.
Nakaangkon naman sang bakiras sa tuhod si Mylene bangud sa ila pagpukotay sang suspek.
