UPDATE: Nagahapa sa kaugalingon nga dugo ang babaye nga ginkilala kay Mary Rose Egca (live-in partner sang suspek) upod ang iya duwa ka kabataan nga naga-edad 1 year and 9-month old kag 7-month old nga lunsay may mga igo sang tiro sa ulo nga nangin rason sang ila kamatayon sa ila puluy-an sa Greenland Subdivision, Barangay 4, Himamaylan City sadtong Sabado nga adlaw.
Ang suspek amo ang haligi mismo sang panimalay nga ginkilala kay Raymundo Diaz, 59 anyos.
Sa esklusibo nga interview sang Radyo Bandera kay PLCOL Romeo Vargas, hepe sang Himamaylan City ginpahayag sini nga base sa ila nakuha nga impormasyon, antes pa man nagluntad ang brutal nga insidente, naglalisay si Mary Rose kag si Raymundo bangud luyag ni Mary Rose nga e-selebrar ang iya ika-24 nga kaadlawan sa ila puluy-an sa Sitio Pukatod, Barangay Payao, Binalbagan kag luyag sini nga updon ang iya kabataan.
Apang, bangud man sa ginapatihan “insecurities” kag selos sang suspek, gintiro niya si Mary Rose gamit ang caliber .38 kag sunod nga gintiro sa ulo ang iya duwa ka kabataan.
Samtang, hinali man nga gintiro ni Raymundo ang iya kaugalingon gamit ang iya pusil nga gintuon sa yubon yubonan kag nangin rason man sang iya kamatayon.
Ang bangkay sang mag-iloy ang yara sa punerarya sang Binalbagan samtang ang bangkay ni Raymund ang yara sa punerarya sang Kabankalan.
Sa karon, ginakabig ang kaso nga solved and cleared bangud napatay ang suspek.
Sa piyak nga bahin nagpanawagan naman si PLCOL Vargas sa mga indibidwal nga nagahupot sang indi lisensyado nga pusil nga dapat magparehistro kag gamiton ini sa intsakto bilang pagdepensa kag indi pag-gamiton bilang pagpatay sa pamilya.
