Ginkumpirmar sang Philippine National Police nga indi “inmate” sa New Bilibid Prison okon NBP ang middleman sa pagpatay sa broadcaster nga si Percy Lapid.
Suno sa mga otoridad, may kaso angut sa iligal nga druga ang “middleman” kag nagahulat sa desisyon sang korte.
Ginpasiguro sang PNP nga nagpakig-angut na sila sa “in charge” sa detention cell, para sa proteksyon kag seguridad sang middleman.
Nagapati ang kapulisan nga, daku ang mabulig sang “middleman” agud matudlo kag mahibaluan kon sin-o ang mastermind sa pagpatay sa beterano nga broadcaster.
Matandaan nga sang tinalikdan nga martes, nag surrender sa mga otoridad ang gunman nga si Joel Escorial.
Ginbulgar ni Escorial nga may tatlo pa siya ka mga kaupod sang ila ginhimo ang kremin.
Ginbulgar man sang gunman nga si Escorial, kon sin o ang nagsugo sa ila okon ang middleman, sa pagpatay kay Percy Lapid okon Percival Mabasa.
Huwebes sang hapon, ginpalayag ni DOJ secretary Jesus Crispin Remulla nga patay na ang middleman.
