Ginaduso sang anay presidente nga si House Senior Deputy Speaker Gloria Macapagal-Arroyo (GMA) nga islan ang K-12 basic education curriculum sang K+10+2 program.
Sa idalum sang House Bill 7893 nga ginaduso ni GMA, ang +2 ukon ang dugang nga duha ka tuig amo ang mangin para lamang sa mga luyag magkolehiyo agud makakuha sang professional degree.
Kun mapatuman ang K+10+2 program, maga-graduate ang estudyante sa fourth year high school kag ang dugang nga duha ka tuig ang mangin “post-secondary” ukon “pre-university”.
Indi ini mangin vocational-technology kundi mangin kaangay sang foundational college courses sa Europe nga magahanda sa ila para sa pagtuon sa unibersidad.
Suno kay GMA, iya ginkonsulta si Education Secretary Vice President Sara Duterte kag ginpahibalo man sini si Presidente Fedinand Marcos Jr.
“Unfortunately, the reality of the market seems to be that the private sector continues to prefer hiring college or university graduates over those who finish the K-to-12 program,” suno sa explanatory note sang hagna.
