Nagabitay sa Mango tree kag wala na sang kabuhi sang masapwan sang iya utod ang 19-anyos nga babayi sa Barangay III Poblacion, siudad sang Himamaylan, takna las 2 sang hapon, Miyerkules, Hunyo 7, 2023.
Base sa imbestigasyon sang Himamaylan City Police Station, ginpahayag sang iloy sang Grade 12 student nga biktima nga nagasuspreher sa “depression” ang iya anak bangud sa sitwasyon sang ila pangabuhi.
Dugang pa sini, takna las 7:00 sang aga nag-chat sa iya ang biktima kag ginsiling sini nga, “ako gani nanay kapoy-kapoy nagid ko, gusto ko na gani magpahuway wa-ay gid da kiss mwah mwah”.
Suno naman sa utod sang biktima, takna las 10 sang aga nakita niya ang iya utod nga nagpauli sa ila balay halin sa eskwelahan, nag-ilis sang bayo kag nagguwa liwat.
Takna las 2 sang hapon, nagpadulong ini sa ginkadtuan sang iya utod kag didto na sini nakita nga nakabitay na sa Mango tree ang biktima.
Gilayon naman nga gindala sa District Hospital sang Himamaylan ang biktima apang gindeklarar ini nga dead on arrival sang attending Physician.
Gindala ang bangkay sang biktima sa El Espedes Funeral Homes nga nahamtang sa Sitio Nato, Brgy Aguisan sa nasambit nga siudad.
Sa mga naga-eksperyensya sang depresyon ukon iban pa nga mental health issues, mahimo makipag-angut sa “Hopeline” sang DOH sa mga numero nga 09175584673 ukon (02) 804-4673.
(Hungod nga wala ginpangalanan ang biktima bangud sensitibo ang balita.)
