Pasado na sa ikatatlo kag ulihi nga pagbasa ang House Bill 7584 ukon No Permit, No Exam Prohibition Act, nga tuyo dumilian ang polisiya nga ‘no permit, no exam’ policy sa mga pribado nga elementarya kag high school sa Pilipinas.
Sa report sang Pilipino Star Ngayon, ini ang matapos makakuha sang boto nga 259-0 sa Kamara ang nasambit nga house bill.
Nahibaluan nga nakasaad sa nasambit nga hagna nga pagahatagan sang tsansa ang mga estudyante sa pribado nga buluthuan nga magakuha sang exam apisar nga wala pa nabayran ang school fees, kabaylo sang promisar sang mga ginikanan ukon guardian nga magabayad sila sa nakatalana nga panahon.
Samtang ginpahanugutan naman ang mga buluthuan nga indi pag-ihatag ang credentials sang mga estudyante kag dumilian nga maka-enroll tubtob sa indi pa mabayran ang kulang nga balayran sang mga estudyante.
Samtang, ang mga magalapas amo ang pagasilutan sang Department of Education (DepEd) kasunod sa Education Act of 1982 kag Governance of Basic Education Act of 2001.
Ang mga ginikanan ukon estudaynte nga indi magasunod sa nasambit nga hagna amo ang posible nga magapangatubang sa kaso nga administratibo ukon pagahatagan sang disciplinary sanction sang buluthuan.*
