TOBOGON, CEBU – Nagalibog sa gihapon ang ulo sang mga residente sang isa ka barangay sa Tabogon, Cebu kun diin halin ang isa ka higante nga itlog nga natukiban sa kagulangan.
Kaangay sa nawong sang isa ka bata ang kadakuon sang nasambit nga itlog.
Suno sa nakakita sa itlog nga si Adelo Singuran, gina-alegar nahulog ang itlog halin sa puno sang mangga, apang duda ini nga naghalin ang itlog sa ostrich bangud wala sang may nagatatap sang nasambit nga sapat sa ila barangay.
Pagpati sang iban, gina-alegar naghalin sa higante nga mga sapat kaangay sang dinosaur ang itlog nga ginabulubanta may kabug-aton nga isa kag ¼ ka kilo.
Sang ipakita ang video sang itlog kay Department of Agriculture Region 7 Administrative Officer Quian Ibarra, ginasuspetsuhan nila nga naghalin ini sa ostrich.
Suno sa opisyal, ang itlog sang ostrich ang may kadakuon nga lima tubtob pito ka pulgada kag nagabug-at sang isa ka kilo.
Posible man nga naghalin ang itlog sa isa ka reptile, apang kinahanglan pa mapaidalum sa eksaminasyon ang misteryoso nga itlog agud mahibaluan kun diin gid ini naghalin.
