Bacolod City – Problema sa paminsaron ang ginalantaw nga rason sang pamilya sang Puerto Rican singer nga si Ricky Martin kun ngaa may “incest allegations” ang hinablos sini batok sa iya.
Suno sa utod ni Ricky nga si Eric Martin, ang ila hinablos nga si Dennis Yadiel Sanchez, 21-anyos, ang nagaantos sang “deep mental health challenges” kag may criminal record man ini.
Base sa alegasyon ni Sanchez, nakaagom siya sang pagpang-abuso gikan sa iya tiyo sa pito ka bulan nila nga relasyon kag iya pa gindugang nga bangud indi mabaton sang singer ang ila pagbulagay, nagfile ini sang temporary restraining order agud nga indi makapalapit ang singer sa iya.
Samtang nanindugan naman ang kampo ni Ricky nga wala sang kamatooran ang alegasyon ni Sanchez apang kun mapamatud-an nga guilty sa “incest charges,” magapangatubang si Ricky sa 50 ka tuig nga pagka-priso.
Si Ricky Martin ang miyembro sang LGBTQIA+ community kag kasado sa iya partner nga si Jwan Yosef humalin pa sang tuig 2017.
Kabahin sa iya mga sikat nga kanta amo ang “Livin’ La Vida Loca” kag “Shake Your Bon-Bon” nga nangin dance craze sang dekada ’90 sa Pilipinas.
