Na-alarma ang Philippine Hospital Association (PHA) sa updated PhilHealth circular nga gin-issue angut sa suspensiyon sang pagbayad sang claims (TSPC).
Suno sa PHA, indi lamang ini makaapekto sa health care providers kundi pati na ang mga pasyente.
“Nakakabahala sa amin ‘yan dahil inilabas nila ‘yung temporary suspension of payments of claims na circular at a time na kami ay nag-aanatay na mabayaran sa malaking utang sa amin simula pa noong lumabas itong COVID pandemic. Last year pa ‘yan malaking amount hindi nababayaran ng PhilHealth sa ating mga providers sa COVID,” suno kay PHA president Dr. Jaime Almora.
Sang Biyernes, ginpapanaog sang PhilHealth ang Circular 2021-0013 angut sa pagsulundan sa TSPC. Suno sa PhilHealth, ginapabaskog nila ang mga tikang agud maseguro ang intsakto nga paggamit sang pondo pinaagi sa pagdetect sang ‘potential fraud’ ukon makaduluda nga claims.
Pahayag ni Almora, wala sa timing ang gin-issue nga circular ilabi na nga nagapangatubang pa sa krisis ang pungsod, nagasuprer na ang mga health workers sa kakulang sang benepisyo nga ginpromisa sa ila, kag nagakinahanglan pa nga mag-upgrade sang mga pasilidad ang mga ospital.
“Kami po natatakot na baka sa meeting na darating sasabihin nila na kaya hindi nila binabayaran ang mga claims dahil fraudulent claims,” suno kay Almora.
Suno sa grupo, may utang pa ang PhilHealth sa mga pribado kag pampubliko nga mga medical facilities sang kapin P20 billion sa COVID-19 claims. Bangud diri, nadula na ang pagsalig sang mga ospital sa mga transaksiyon sini sa PhilHealth.
