Ginkumpirmar sang mga otoridad nga si Jovelyn Galleno gid man ang tul-an nga nakit-an sa Barangay Sta. Lourdes, Puerto Princesa, Palawan.
Suno kay Puerto Princesa City Police Spokesperson Police Captain Maria Victoria Iquin, 99.9 porsyento nga naga “match” ang DNA sample nga ginkuha sa bangkay kag sa “swab sample” nga ginkuha sa iloy ni Galleno.
Si Jovelyn amo ang dalaga nga gindeklarar “missing” sang tinalikdan nga Agosto 5, matapos nga nag trabaho sa isa ka mall sa Puerto Princesa.
Sang Agosto 23, nakit-an ang tul-an ni Jovelyn kalakip na ang pila ka mga kagamitan sang biktima sa isa ka masi-ot nga lugar.
Ang pakaisa sang biktima nga si Jobert, nag-aku na sa kremin kag gintudlo man sang suspek ang ginahamtangan sang tul-an ni Jovelyn.
Ginkumpirmar man sang kapulisan nga ginhimuslan ang dalaga.
Suno kay PNP spokesperson Iquin, nabuking ang ginhimo sang magpakaisa nga sanday Yubert kag Jobert sang nagbun-anay ang duha matapos nga naglalisay.
Samtang ginapatigayon ang imbestigasyon, diri na gin-aku ni Jobert ang kremin nga ila ginhimo sa pakaisa nga si Jovelyn.
