Gina-alegar ginkastigo-patay sang isa ka security guard sang Carlos Hilado Memorial State University – Fortune Towne Campus sa Barangay Estefania, siudad sang Bacolod kaina sang aga sini nga Lunes, Mayo 8, 2023.
Suno sa isa ka concerned student sang nasambit nga unibersidad, nagtinguha magsulod sa campus ang ido apang ginpunggan ini kag ginsipa sang naga-duty nga security guard.
Nahadlok ang ido kag gindepensahan sini ang iya kaugalingon tutbob nagkuha sang kahoy ang security guard kag ginlampusan ang ulo sang sapat sang makapila nga beses.
Nagahigda na lamang kag indi na makagiho ang ido apang padayon ini sa gihapon ginakastigo sang security guard.
Ginsinggitan naman sang mga estudyante ang security guard nga mag-untat na apang nagpawala lamang ini kag nagpadayon sa gihapon sa pagkastigo sa ido tubtob mapatay ini.
Gin-imbestigaran naman sang Community Animal Rescue Efforts CARE, Inc. kaupod ang inSpyRed ang nagluntad nga insidente.
Didto nila na-istorya ang school security supervisor kag ang security guard nga imboldado sa nasambit nga insidente.
Suno sa security guard, buhi ang ido kag naglakat pa ini palagyo sa unibersidad kabaliskaran sa ginsaysay sang nakasaki. Dugang pa sini, ‘self-defense’ lamang ang iya ginhimo.
Nagpatigayon naman ang CARE sang meeting sa tanan nga staff sang unibersidad agud maghatag sang impormasyon angut sa insakto nga pagkapyot sang ini nga sitwasyon.
Ginaduso man nila ang ‘awareness’ sa welfare act kag mangin ang sa anti rabies act.*
