Wednesday, February 8, 2023

Isa pa gid ka insidente sang ‘Gas and Run’ sa Bacolod, nakuhaan sang CCTV

- Advertisement -

BACOLOD CITY – Nakuhaan sang closed-circuit television camera footages sang isa ka gasoline station sa CL Montelibano, syudad sang Bacolod, ang insidente sang gin-alegar “Gas and Run” sadtong Domingo, Setyembre 11, 2022.

Makita sa CCTV footages ang isa ka Toyota Innova nga nagaduag Silver sang ini ang nagpatughong sa gasolinahan.

Sa interview sang Radyo Bandera sa accountant sang gasolinahan, iya ginpahayag nga may dala nga 5 ka containers sa likod sang salakyan ang nasambit nga persona.

- Advertisement -

Nagpatughong ini sang tatlo ka container sang diesel kag sang napuno na ini, nagpatughong pa gid ang lalaki sang tangke sang iya salakyan.

Ginpapanaug sang lalaki ang duha pa gid ka nabilin nga containers kag nagpatughong sang unleaded nga gasolina.

Samtang ginatughungan sang pump attendant ang duha ka containers kag naga-monitor ini sa metrohan, naghambal ang lalaki nga maliso anay ini.

Apang, nag-amat-amat na lakat ang salakyan kag wala na nagbalik pa.

Nagpa-blotter na lang ang pump attendant sa Bacolod Police Station 4.

Kapin P10,000 ang natughong nga gatong sang nasambit nga persona.

Pagkadason nga adlaw, may yara man sang reported nga kapareho nga insidente sa Barangay Mandalagan, kung diin nagpatughong ang customer sang duha ka containers sang diesel, isa ka container sang unleaded kag sang tangke sang iya salakyan.

Tigayon nga natughungan ang duha ka containers kag ang iya salakyan, samtang ginbilin ang isa ka container nga unleaded sang ini ang nagsibat kag wala man nagbayad.

Gina-abisuhan naman ang mga pump attendants nga kuhaon gid anay ang bayad antis magtughong kag kung kaduluda ang tawo, mahimo nga kuhaon ang plate number sang iya salakyan.

Ginaganyat man ang mga gasoline stations nga magtakod gid sang CCTV cameras.*

- Advertisement -
Shiela G. Gelera
Shiela G. Gelera
Shiela G. Gelera is a Bacolod City/Negros Occidental-based journalist who has covered various beats since she started her media career in 2013 up to the present. She had worked with the oldest local daily newspaper in the Visayas before she hopped into the broadcast industry. Currently the news director of Radyo Bandera Sweet FM Bacolod. Aside from being with the local media outfit, she is also a news stringer for a national media network and a story contributor for a local news daily in Bacolod.

Related Articles

Leave a Reply

Stay Connected

- Advertisement -

Latest Articles