Warning: graphic content
CADIZ CITY – Patay ang isa ka rider sang motorsiklo samtang pilason ang duha pa matapos gin-araro sang isa ka dump truck ang isa ka cargo truck kag duha ka mga motorsiklo sa Crossing Bag-ong dalan, Brgy. Cabahug, siudad sang Cadiz pasado las tres sini lamang nga hapon sang Miyerkules, Enero 25.
Sandig sa interview sang Radyo Bandera sa mga saksi kag report sang kapulisan, paliko na kuntani pasulod sa Bag-ong Dalan sa direksyon nga Cadiz padulong sa Sagay ang cargo truck nga ginamaneho ni Arturo Pateno, 42-anyos nga residente sang Brgy. Magsaysay sa nasambit man nga siudad.
Apang hinali na lamang nga nabungguan ang nalikod nga bahin sini ang nagasunod nga dump truck nga ginamaneho naman ni Joseph Coniendo, 53-anyos nga residente sang siudad sang Sagay, nga na alang-alang sa pagpreno bangud sa gina-alegar madasig sini nga pagpadalagan.
Pagkabunggo sang dump truck sa cargo truck, dumiretso ini sa kasugata nga mga motorsiklo nga nagapadulong naman sa pihak nga linya.
Nakaangkon sang malubha nga injury sa ulo kag lawas ang drayber sang motorskilo nga Yamaha Mio nga si Arlo Galleron, 31-anyos nga residente sang Brgy. Luna sa siudad sang Cadiz.
Samtang pilas man sa lawas kag bali sa tiil ang naagum sang drayber sang motorsiklo nga Suzuki Gixxer nga si Roger Decanay, 30-anyos nga residente sang siudad sang Bacolod kag pilason man ang drayber sang dump truck bangud sa pagka-ipit sang nabunggo ini sa puno sang kahoy.
Naguba man ang isa ka traysikol nga naka-park sa higad sang dalan sang malasak ini sang cargo truck nga nagdiretso matapos mabungguan sang dump truck.
Gindala pa ang pilason nga mga biktima sa Cadiz City Emergency Clinic apang gindeklarar si Galleron nga dead-on-arrival.
Masuwerte naman nga nakadalagan palayo ang mga nagapungko sa bahin sang traysikol sang makita nila ang nagapadulong nga cargo truck.
