BACOLOD CITY – Nakilal-an na ang isa sa tatlo ka mga gin-alegar katapo sang New People’s Army nga napatay sa engkwentro sa nabukid nga bahin sang Barangay Oringao sa Kabankalan.
Ginkilala ang isa sa mga bangkay nga si Jomarie Calumba, 47-anyos, residente sang Bugni, Barangay Oringao sa Kabankalan.
Sa karon si Calumba pa lang ang na-identify sang utoridad samtang wala pa makilal-an ang duha ka iban pa gid ka mga patay.
Nagluntad ang asud-asud nga engkwentro sadtong weekend sa tunga sang mga NPA kag 94th Infantry Battalion sa Sitio Bugne, Barangay Oringao.
Nagresulta ang engkwentro sa pagkapatay sang ginapatihan NPA kag pagpangbakwit sang masobra 800 ka mga indibidwal.
Samtang, as of today, Monday, nakapauli na ang mga evacuees halin sa evacuation center padulong sa ila tagsa ka mga panimalay.
Narekober man sang mga soldado sa encounte site ang isa ka M14 Rifle, isa ka caliber .38 pistol, isa ka caliber .45 pistol, backpacks nga may mga personal nga gamit kag subversive documents.
Wala naman sang may casualty sa bahin sang pwersa sang gobyerno.*
