Ginpahayag sang hepe sang Bacolod City Police Station 7 nga kaangtanan sa iligal nga druga ang posible isa sa mga motibo sa pagluthang-patay sa isa ka barbero sa tupad sang Our Lady of the Miraculous Medal Parish and Shrine sa Barangay Mansilingan, Bacolod City , Biyernes sang gab-i.
Suno kay Police Captain Elmer Bonilla, base sa ila nga rekord, nabuy-bust sang mga otoridad ang biktima nga si Alyas Tinot Bantigue sadtong 2019 kag may yara man ini sang ginapangatubang nga theft case.
Nahibaluan nga si Bantigue ang isa pa lamang ka bulan nga nakaggwa sa prisuhan kag nagtrabaho ini bilang barbero sa isa ka barbershop sa nasambit man nga barangay.
Ginsiling ni Bonilla, ila sa karon ginatinguhaan nga makakuha sang CCTV footage sa lugar nga posible makahatag sa ila sang lead sa mga suspetsado nga nagasakay sa motorsiklo, nakabonet kag nakahelmet.
Ila man ginatinguhaan nga makakuha sang witness nga makabulig sa ila imbestigasyon.
Madumduman, nga nagalakat si Bantigue sa lugar sang ginluthang ini sang mga suspetsado nga nag-igo sa iya nga agtang nga amo ang gintunaan sang iya kamatayon.*
