Kahalitan sa sunog sa Barangay 6, Bacolod, nagdangat sa P195,000

Sandig sa inisyal nga report nga ginpaguwa sang Bureau of Fire Protection (BFP) – Bacolod ginabulobanta nga nagdangat sa P195,000 ang kahalitan sa sunog nga nagluntad sa Gatuslao Street, Purok Makapiña sa Barangay 6, Bacolod City.

Takna las 3:38 sang hapon, Miyerkules, Agosto 31 nag-umpisa ang sunog sa isa ka boarding house kag gindeklarar nga fire-out takna las 3:57 sang hapon, nga nagdangat sa first alarm.

Sa inisyal nga imbestigasyon sang BFP nag-umpisa ang kalayo sa nasidlangan nga bahin sang balay nga gina-istaran ni Ruel Campo.

Wala naman sang napilasan sa nasambit nga sunog.

Samtang padayon pa nga ginahibalo sang BFP ang gintunaan sang sunog.

Ika-duha na ini nga sunog sa siyudad sang Bacolod sa sulod sang isa ka adlaw.*