BACOLOD CITY – Isa ka kalansay ukon tul-an sang tawo ang nakit-an sa Purok Kahirup A, Barangay Mansilingan sa syudad sang Bacolod, takna las 5:30 sang hapon, Domingo, Setyembre 4, 2022.
Sandig sa imbestigasyon, duha ka mga menor de edad nga kabataan ang nag-report sa kapulisan nga may nakit-an sila nga kalansay sa abandonado nga balay.
Nagpadulong sa lugar ang katapo sang Bacolod Police Station 7 kag nahibaluan nga nagapaninlo ang mga kabataan sa kwarto sa nasambit nga balay sang madiskubrehan nila ang skeleton sa idalum sang mga guba nga katre kag mga basura.
Ginsugo sang tupad balay ang mga kabataan nga maninlo sa abandonado nga balay, suno kay P/Capt. Elmer Bonilla, hepe sang Station 7.
May nakita nga plastic ang mga kabataan kag sang ila pagbukas sini, didto nakit-an ang kalansay.
Base sa impormasyon sang barangay, may yara anay sadto nga nagapakalimos nga gulpiyada lang nadula, duha tubtob tatlo na katuig ang nagligad.
Sang tinalikdan nga duha tubtob tatlo ka tuig, nakapanimaho man ang mga residente sa lugar sang tuman ka baho nga nagahalin sa nasambit nga balay kag matapos ang isa ka semana, nadula man ang baho.
Wala naman nagsulod ang mga kaingod balay bangud indi man sila magrisgo kag nahadlok sila nga makasuhan sang tag-iya sang balay.
Posible nga natumbahan sang cabinet ang biktima kag wala na makahalin, suno kay Bonilla.
Madamo sang plastic kag may jacket kag delargo nga masami ginagamit sang biktima sang buhi pa ini ang nakita sa lugar, nga masami niya ginatiniran, suno sa interview sang kapulisan sa barangay.
Nag-request na sang skeletal examination ang kapulisan sa SOCO.
Ipalubong na sang barangay ang kalansay.*
