BACOLOD CITY— Ginalantaw sang kapulisan nga wala sang foul play sa kamatayon sang 31-anyos nga lalaki sa Barangay Zone 15, syudad sang Talisay, Negros Occidental, kaina sang kaagahon, Oktubre 11, 2022.
Suno kay Police Chief Master Sergeant Reginaldo Suelto, case investigator sang Talisay City Police, sandig sa ila imbestigasyon, gin-utas sang biktima ang iya nga kaugalingon nga kabuhi.
Manug tulog na kuntani ang biktima sa ila sulod balay kaupod ang iya ginikanan apang ini ang naggwa pa.
Inoras ang nagligad kag nasapwan na lamang sang amay ang biktima nga nagahigda sa hilamon.
Dugang pa, may igo ini sang bala sang wala pa mahibalu-an nga kalibre sang armas-luthang sa iya nga agtang.
Gindala ang biktima sa Talisay City Health Center apang gindeklarar nga dead-on-arrival.
Ginapatihan nga nanghikog ang biktima bangud wala man sang tawo nga pwede makasulod sa subdivision kag maghimo sang krimen, suno kay Suelto.
Pahayag naman sang amay nga may problema ang iya anak sa paminsaron kag naga-inom ini sang maintenance nga Zyprexa ukon Olanzapine, isa ka antipsychotic nga bulong para sa may problema sa paminsaron.
Gina-alegar man nga ginbakal online sang biktima ang armas-luthang nga gin-gamit sini.
Padayon sa karon ang imbestigasyon sang kapulisan sa nasambit nga insidente.*
