BACOLOD CITY – Gindakop ang isa ka lalaki matapos makuhaan sang ginabulubanta 50 ka gramos sang ginasuspetsuhan shabu sa ginpatigayon nga buy-bust operation sa Purok Kahirup, Brgy. Singcang-Airport, siudad sang Bacolod las-8:28 sang gab-i sang Martes, Pebrero 21.
Ginkilala ang suspetsado nga si Hector Deximo, alyas “Boboy”, 32-anyos nga residente sang Purok Lagang, Brgy. Katabla Zone 3, siudad sang Talisay kag ginakabig sang kapulisan bilang isa ka high-value individual (HVI).
Base sa report sang Bacolod Police Station 8, nakumpiskar sa suspek ang napulo ka dalagku nga sachets sang ginasuspetsuhan shabu nga nalakipan sang buy-bust item kag ginabulubanta nagabug-at sang 50 ka gramos kag nagabalor sang P340,000.
Nakahunong ang suspek sa nasambit nga police station para sa nagakaigo nga disposisyon.
Nagapang-atubang ini sang mga kaso sa paglapas sa Sections 5 kag 11 sang Republic Act No. 9165 ukon ang Comprehensive Dangerous Drugs Act.
