PONTEVEDRA – Tatlo ka mga suspetsado nga nalakipan sang isa ka high value indiviudal (HVI) kag sang iya amay ang nadakpan sa ginpatigayon nga buy-bust operation sa Purok Malinong, Brgy. Miranda, banwa sang Pontevedra takna las-2:55 sini lamang nga hapon sang Biyernes, Marso 23.
Base sa report sang Pontevedra Municipal Police Station, nakumpiskar sa mga suspek ang 13 ka sachets sang ginasuspetsuhan shabu nga ginabulubanta nagabug-at sang anum ka gramos kag nagabalor sang P40,800 kag iban pa nga mga drug paraphernalia.
Nalakip sa mga suspek sanday Richard Villaspin, 41-anyos kag ginakabig nga HVI sang kapulisan kag iya amay nga si Ricardo Villaspin, 71-anyos; lunsay mga wala sang trabaho kag mga residente sang nasambit nga lugar.
Samtang ginkilala naman ang isa pa ka suspek nga si Vincent Samulde, 37-anyos nga laborer kag residente sang Sitio Camingawan, Brgy. Antipolo, sa nasambit nga banwa.
Nagapang-atubang ang mga suspek sang mga kaso sa paglapas sa Sections 5, 11, kag 12 sang Republic Act 9165 ukon ang Comprehensive Dangerous Drugs Act angut sa pagbaligya kag pag-angkon sang iligal nga droga kag paraphernalia.
