CANDONI – Nakit-an na ang ang karabaw nga gina-alegar rason sa pagpangluthang kag pagpanglabo sa tatlo ka mga biktima sa Sitio Buyong, Brgy. Cabia-an, banwa sang Candoni.
Suno kay Police Major Ruel Culanag, hepe sang Candoni Municipal Police Station, wala sang higot kag ginbilin na lamang ang nasambit nga karabaw.
Ginalantaw sang kapulisan nga ginkawat sang suspetsado ang karabaw nga ginapanag-iyahan sang mga biktima nga si Edmund Castro, 45-anyos kag 10-anyos sini nga bata; lunsay mga residente sang Brgy. Haba sa nasambit nga banwa.
Gina-alegar man ni PMAJ Culanag nga posible nga kilala sang bata ang suspek, rason kun ngaa ginlagas kag ginlabo-patay ini sa may sapa.
Dugang pa ni PMAJ Culanag, nagabusong ang babayi nga ginluthang-patay nga si Analie Emaray, 44-anyos nga residente sang Brgy. Cabia-an, suno sa iya nga bana.
Kun makumpirmar sang mediko legal nga nagabusong si Emaray, magapang-atubang ang mga suspek sang apat ka counts sang kaso nga murder.
May yara na sang person of interest kag circumstantial evidence ang kapulisan apang nagapangita pa sang magatindog nga saksi.
