Ginpasakaan na sang kaso nga pagbayolar sang Comprehensive Firearms and Ammunition Regulation Act (RA 10591) and the Law on Explosives (RA 9516), sanday Jose Pablo Gimarangan kag Roland Aguisanda Pablio, nga naaresto sa ginpatigayon nga raid sa mga propiyedad sang mga Teves sa Negros Oriental.
Suno sa CIDG, nadalahig man sa kaso si Negros Oriental Representative Arnolfo Teves Jr.
Ginpasaka ang kaso Martes nga adlaw, Marso 14.
Samtang, ginpasaka naman ang kaso angut sa pagbayolar sang RA 10591 batuk nanday Hannah Mae Oray, Heracleo Sangasin Oray, Rodolfo Teves Maturan kag Joseph Kyle Catan Maturan.
Yara na sa kustodiya sang Criminal Investigation and Detection Group ang mga respondents.
Ginpasaka ang kaso batuk sa anum ka mga persona, matapos nga ginpatigayon ang “raid” sa lima ka mga nagkalain lain nga propiyedad sang pamilya Teves sa Bayawan city kag banwa sang Basay sa Negros Oriental, Biyernes nga adlaw, Marso 10.
Sa nasambit nga raid, naaresto ang mga respondents sa kaso, magluwas kay Representative Teves nga wala pa makabalik sa Pilipinas sang ginserbi ang search warrants.
Suno sa CIDG, ipasaka man ang kaso nga pagbayolar sang RA 10591 kag RA 9516 batuk kay Representative Arnolfo Teves, Kurt Mathew Teves kag Axel Teves, sa mas madali nga panahon.*
