Ginbasura sang Office of the Ombudsman ang kaso nga graft batok kay anay Tourism Sec. Wanda Tulfo-Teo, utod nga si Ben Tulfo kag mga opisyales sang PTV-4 angut sa kontrobersyal nga P60 million ad placement deal.
Sa 21-page resolution nga ginsulat ni Rosano Oliva, Graft Investigation and Prosecution Officer III, kag gin-aprubahan ni Ombudsman Samuel Martires sadtong Setyembre 30, 2021, gindismiss ang kaso bangud sa kakulang sang ebidensya.
Magluwas kay Teo, gindismiss man ang kaso batok kay Arlene Mancao, anay executive assistant ni Teo; Dino Antonio Apolonio, anay general Manager sang PTV; Ramon del Rosario, anay pamuno sang Airtime Management Group sang PTV kag Ma. Alma Francisco, administrative officer IV sang Presidential Communications Operations Office (PCOO).
Nag-ugat ang kaso sa P60 milyong advertisement sang DOT sa programa ni Ben Tulfo sa PTV nga “Kilos Pronto”. Nauna na nga ginbuyagyag sang COA nga posible nga may paglapas si Teo sa Anti-Graft and Corrupt Practices Act bangud sa gina-alegar “conflict of interest”.
Pero suno sa desisyon sang Ombudsman, nagagwa nga wala sang kahilabtanan si Teo sa kontrata nga ginsulod sang PTV kag Bitag Media ni Ben Tulfo angut sa DOT advertisement.
Nakasaad man sa amo nga desisyon nga nasunod ang tanan nga ‘contractual obligation’ sang natungdan nga advertisement.
