Ginkumpirmar ni PMaj. Bonifacio Aral, Hepe sang San Enrique Municipal Police nga ipasaka subong nga aga ang kaso nga “murder” batok sa isa ka lalaki nga nagluthang sa nobyo sang iya pakaisa.
Suno kay Aral tinguhaan nila nga mapasaka ang kaso subong nga aga batok sa suspek nga detinado karon sa Custodial Facility sang San Enrique PNP.
Ang biktima ang ginkilala kay Chulo Placido, 22 anyos, kag residente sang Barangay DSB, banwa sang Pontevedra.
Nagluntad ang insidente pasado las 3 kahapon sang kaagahon, Hunyo 14, 2022 sa Barangay Batuan, sa nasambit nga banwa.
Sa interview sang Radyo Bandera kay PMaj. Aral iya ginpahayag nga nakabaton sang report ang ila talatapan nga may aksidente nga nagluntad sa nasambit nga lugar nga naga imbolbar sang isa ka persona nga nagasakay sa isa ka Suzuki Raider nga motorsiklo nga nagaduag sang itom.
Gilayon naman ini nga ginrespondehan sang mga kapulisan kag mga personnel sang BFP-San Enrique kag gindala ang biktima sa Valladolid District Hospital.Takna las 6 naman sang aga sang nagtawag ang guard on duty sang nasambit nga ospital nga ginbawian sang kabuhi ang biktima kag may nakita ang doktor nga pilas sa nawala nga bahin sang iya likod nga agi sa tuga sang pagtiro gamit ang armas-luthang.
Nagpatigayon gilayon sang follow-up operation ang San Enrique PNP kag tigayon nga madakpan ang suspek nga pakaisan man lang sang nobya sang biktima.
Sandig sa imbestigasyon sang San Enrique PNP gindul-ong ni Placido ang iya nobya sa balay sang tiya sini sa Barangay Batuan antis ang insidente.
Ginapatihan naman nga papuli na ang biktima sang ginluthang ini sang suspek bangud nakita ang dugoon sini nga lawas 50 metros halin sa balay sang tiya sang iya nobya.
