Ginkumpirmar sang Department of Health (DOH) nga nagdamu ang mga indibidwal nga nagpositibo sa dengue virus sa 14 ka mga rehiyon sa bilog nga Pilipinas.
Suno sa ahensya, may yara sang 17 ka mga regions sa Pilipinas kag 14 diri ang may madamu na sang dengue cases nga naglab-ot sa 39,705, humalin sang Enero 1 tubtub Hunyo 4.
Mas mataas sang 31 porsyento ang kaso sang dengue sini nga tuig, kumparar sa kadamuon sang kaso sang tuig 2021, sa pareho man nga mga binulan.
Kalakip sa mga rehiyon nga may pinakamadamu nga kaso amo ang Central Visayas, Central Luzon kag Zamboanga Peninsula.
Sini nga tuig 202 ka mga indibidwal nga nagpositibo sa dengue virus ang nabawian sang kabuhi.
Angut sini, liwat nga ginpahanumdum ni DOH undersecretary Maria Rosario Vergeire sa publiko, nga gub-on ang mga breeding sites sang lamok okon mga lugar sa diin nagamu-ad okon nagapangitlog ang mga lamok.
Kinahanglan man nga mag-gamit sang mga panapton nga makahatag sang proteksyon batuk sa kagat sang lamok, subong man ang pag-gamit sang “insect repellent”.
Kinahanglan man nga magpakonsulta sa gilayon kon magbatyag na sang mga una nga sinyales kag sintomas sang dengue infection.
Magpatigayon sang “fogging” kon nagadamu na ang impeksyon sa lugar.*
